Դեկտեմբերի 3-ը Հաշմանդամների միջազգային օրն է. calend.ru

1992 թ.՝ Միացյալ ազգերի կազմակերպության Հաշմանդամների տասնամյակի ավարտին (1983-1992), ՄԱԿ-ի Գլխավոր ասամբլեան իր №47/3 բանաձևով   դեկտեմբերի 3-ը հռչակեց Հաշմանդամների միջազգային օր (International Day of Persons with Disabilities), որի նպատակն էր բարձրացնել ինչպես հասարակական կառույցներում, այնպես էլ զարգացման գործընթացներում հաշմանդամություն ունեցող անձանց ներգրավմանը վերաբերող կարևոր հարցերի իրազեկվածությունը և աջակցության մոբիլիզացիան:

Վերոնշյալ տասնամյակը եղել է տեղեկացվածության բարձրացման և հաշմանդամների վիճակի բարելավման նպատակով միջոցառումների անցկացման և նրանց համար հավասար պայմանների ապահովման ժամանակաշրջան:

Ավելի ուշ ՄԱԿ-ի Գլխավոր ասամբլեան ՄԱԿ-ի անդամ պետություններին կոչ արեց ամեն տարի նշել օրը՝ անցկացնելով  հասարակական կյանքում հաշմանդամություն ունեցող անձանց հետագա ինտեգրմանը նվիրված միջոցառումներ:

Աշխարհում ապրում է մոտավորապես մեկ միլիարդ հաշմանդամ (այն կազմում է աշխարհի բնակչության մոտավորապես 15 տոկոսը), և նրանք բոլորը բախվում են ֆիզիկական, սոցիալ-տնտեսական ու վարքագծային պատնեշների հետ, որոնք բացառում են հասարակության կյանքում նրանց լիարժեք, արդյունավետ և իրավահավասար մասնակցությունը : ՄԱԿ-ի տվյալներով՝  նրանք աշխարհի ամենաաղքատ բնակչության անհամեմատ մեծ մասն են կազմում, ինչպես նաև նրանք չունեն հավասար հնարավորություններ հիմնական ռեսուրսների նկատմամբ, ինչպիսիք են՝ կրթությունը, զբաղվածությունը, առողջապահության, սոցիալական և իրավական աջակցության համակարգը:
 

Այդ պատճառով Հաշմանդամների միջազգային օրը՝ դեկտեմբերի 3-ին, միջոցառումների անցկացումն ուղղված է հաշմանդամների խնդիրներին, նրանց արժանապատվության, իրավունքների պաշտպանության և բարեկեցության ապահովման վրա հասարակության ուշադրությունը հրավիրելու, ինչպես նաև կենտրոնացնելու այն առավելությունների վրա, որոնք հասարակությունը ստանում է քաղաքական, սոցիալական, տնտեսական և մշակույթային կյանքում հաշմանդամների մասնակցության շնորհիվ:

Այս օրը հռչակվել է  հասարակության կյանքում հաշմանդամների լիարժեք և հավասար մասնակցության, մարդու իրավունքների պաշտպանության նպատակով: Այս նպատակներն առաջադրվել են Հաշմանդամների վերաբերյալ Գործողությունների միջազգային ծրագրում, որն ընդունվել է 1982 թվականին Գլխավոր ասամբլեայի կողմից:

Յուրաքանչյուր տարի տվյալ Օրվա շրջանակում իրականացվող միջոցառումները նվիրված են լինում կոնկրետ թեմայի: Այսպես, տարբեր տարիներ օրվա կարգախոսը եղել են հետևյալ բառերը ՝ «Արվեստ, մշակույթ և անկախ կենսակերպ», «Նոր հազարամյակում մատչելիություն բոլորի համար», «Լիարժեք մասնակցություն և հավասարություն, սրանք են առաջընթացի և արդյունքների գնահատման նոր մոտեցումների պահանջները», «Ինքնուրույն կյանք և կայուն շահույթ», «Առանց մեզ՝ ոչինչ մեր մասին», «Հաշմանդամների իրավունքները՝ գործունեությունը զարգացման գործընթացում», «Արժանապատիվ աշխատանք հաշմանդամների համար», «Հաշմանդամություն ունեցող անձանց իրավունքների մասին կոնվեցիան արժանապատվություն և արդարություն է բոլորիս համար», «Վերացնենք պատնեշները, բացենք դռները. բաց հասարակություն բոլորի համար» և այլն:

Հիշեցնենք, որ Հաշմանդամների իրավունքի համար պայքարի Միջազգային օրը նշվում է յուրաքանչյուր տարի մայիսի 5-ին:
 

Հարցեր, պատասխաններ, մեկնաբանություններ